Pétèt, zot i kroi larzan Léta la donn bann bank — pou fé ardémar lékonomi — sé larzan fouti, larzan pèrdi, larzan gaspiyé (vinn-sink miliar solon lo prézidan la Répiblik)... Mé alor i oi zot i koné pa lo prézidan, zot i koné pa bien son politik, pars zédi soir li la byin éspliké.

Li la di : sé pa larzan doné, sé pa larzan gaté, sé in larzan prété. É ki di prété, i vé dir osi gingn zintéré. Sa i sava raport Léta — aryink pou lané 2009 — in miliar kat san milyon l’éro. Ala in bon nouvèl ! Zot i di pa zot ?
Mé nana in dézyinm bon nouvèl : sa va ansèrv pou lo sosyal. Alor i fé plézir antann in n’afèr konmsa dan la boush nout prézidan la Répiblik. Sa lé byin vré ! Po inn foi, i mazine bann ti-kolon.

Solman, a s’ki paré, kan bann zournalis i domann son bann sèrvis koman la fé kalkil-la, na poin pèrsone pou réponn : inn i anvoy la boul avèk l’ot, l’ot avèk in n’ot. Rézilta : pèrsone i oz pa donn in répons.
Alor in pé i di ankor : kosa in n’afèr konmsa i sava doné ? É si i donn pa aryin ? Si kan i ariv finn lané, so larzan-la lé pa dann kès Léta ? É bin, lé pa grav vik i sifi invant in répons pou la finn lané. Onz moi, na l’tan trouv inn krak.
... An atandan, kabri i manz salad !

Justin