Dabor kèl onz novanm ni anparl
Byinsir la pa onz novanm mil-nèf san dizuit, lo zour bann z’Alman avèk bann z’alyé la sign larmistis la guèr 1914-1918 dann in wagon lo trin la-ba dann in vilaz i apèl Rotonde. Lé pa késtyonn vol son plas ! La pa non pli lo onz novanm 1973 kan l’armé la fé in kou d’éta dann Chili pou ranvèrs lo gouvèrnman la gosh, é lo komansman in péryod byin noir pou lo pèp péi-la ;
Sak ni fé la sélébrasyon, sé lo onz novanm 1882, lo zour gouvèrnman z’Anglé la déside arète anvoy bann z’angajé té i sort l’Inde pou vni travay issi La Rényon, dann karo kann épi dann l’izine... In désizyon té i falé pran pars bann z’angajist té i réspèk pa lo kontra l’avé sign dann l’Inde. Té i falé vréman arète èk sa, mé mi pans nou nora l’okazyon anparl de sa.

Kèl z’angajé ni pans
Daniel Minienpoullé, lo prézidan la Fédérasyon tamoul, la byin di, i fo ni pans toute nout bann zansète angajé, sof kèl koté zot i sort pou vnir issi La Rényon. Byinsir l’avé in bon pé d’moun l’Afrik, l’avé in bonpé Tamoul, demoun Madégaskar, mé l’avé galman demoun i sort in pé partou dann l’oséan indyin. Ziska demoun la Chine la vni issi. L’avé demoun in pé toute rolijyon, rolijyon malbar, mizilman, pétète katolik, sirman bann rolijyon té i amène in pé partou, dann l’Afrik, Madégascar, épi tout lé z’ot ankor, ni sava pa nonm tout dann pti modékri-la. Dizon, banna la vni ranfors ankor la kalité arkansyèl bann Rényoné.

Mé lésklavaz nana son zour ofisyèl dépi 1982. Akoz pa in zour ofisyèl pou bann z’angajé ? Akoz gouvèrnman i pran pa in dékré pou fiks zour-la in zour pou toute nout bann zansète angajé ? Mi pans soré in bon nouvèl pou La Rényon.

Justin