Figuir azot malgré bande kanikrosh-la lo préfé la di : Mwambushu, sa in l’opérassion li-épi lé zot-i prépar dopi in an é toute kondission lé réini pou ké li réissi… Konm koi, souvan défoi demoune i gagnré a tourne sète foi zot lang dann zot boush avan kozé. Sa sé in patoi rényoné, mé mi panss li néna in valèr intèrnassyonal é li vo galman pou in Préfé i ranpli son fonkssyon dann Mayotte.

Astèr i fo apèl in sha in sha, é in l’opérassion lé dir pou dékolé in l’opérassion lé dir pou dékolé. Mé oila, l’opérassion-la, i fo kroir néna bonpé d’moune Mayotte i atande sa pars zot i kroi vréman sa i sava ramenn la pé dsu zot téritoir : bande san papyé lé vizé, bande moune i rèst dann banga lé vizé, é d’apré sak i di sé in majorité d’moune i sorte komor. Band Mayotte i komanss pèrde passyans é zot i domande gouvèrnman franssé fé lo nésséssèr é lo pli britalman possib konm par ézanp kan zot i fèrm in dispanssèr la plipar bande passyan i sorte d’apré zot péi komor.Mèm in vis-prézidan konsèye départmantal la di dann téklé i fo tyéin pé konmsa zot va konprande.

Yèr matin zot la manifèst dovan la préféktir La Rényon, konmsa gouvèrnman i oi zot lé déssidé é i rolanss le l’opérassion MWambushu. Mé si mi kroi nout zoinal minis l’intèryèr La franss na poin lo moiyin k’i fo pou fé in l’opérassion konmsa sirtou avèk toute kalité dérapaz possib… Minist l’intèryèr La franss i sorte kritike gouvèrnman l’Italie. An rotour li la toush in boush-ta-guèl é konm li la mète ali dsou lo fé l’aktyalité i étoneré pa si dann l’avnir d’ote gouvèrnman i drèss ali in kostar koréspondan a li é a toute bande vyolassion lo droi li épi son gouvèrnman lé kapab dopi in takon d’zané…

Astèr ni konpran bien néna plizyèr danzé i akimil rante La franss, Mayotte, péi komor, mèm La Rényon lé kab gingn in ké d’siklone. Kan i di i fo la médyassion, i fo la diskissyon,si ni pé avoir in solission sète-la i pé z’ète ke passifik é politik.Sé la voi d’la rézon, é lé irzan antande voi-la mèm si èl lé in pé fèb pou l’instan ?

A bon antandèr, salu !