L’apré fé in mouvman l’èd himanitèr pou lo sid madagascar. Banna i apèl sa “l’opération Kéré”. I ramass larzan pou mète in pé bann rézèrvoir d’lo d’issi-d’laba, konmsa nora in rézèrv de lo kan la séshrèss va artourné. I fo oir koman bann jèn nana d’gou fé in zès pou èd bann malgash. Toudinkou, nana in bon pé i an apèrsoi bann malgash sé in pé nout bann frèr, nout bann kouzin, nout zansète.

Sa lé bien sa ! Sof, mi ansouvien mon granpèr lavé di amoin, la-ba dann péi lantandroy, li lavé gingn in gran konséssion : in mine sel-gemme. La maladi la anpèsh ali tro ranpli son pla... Na poin lontan, in moun la parti ésploit in mine diaman, la niabou tir in bèl pièr présièz. Apré, li la bour l’fèr la rénion akoz li lavé pèr i ariv ali in mové déstin. Li l’apèl pièr-la “La Réunion”. Oui oté !

Dann sid madagascar, nana in bann gro kapitalis fransé-li, rénioné-li, zaponé-li, kanada-li i tir tout bann rishès néna la-ba, sou la tèr, dan la mèr épi sü la tèr galman. Bann malgash i ramas mèm pa bann ti-miète.
Alor, pardon éskiz si moin la pa anvi may amoin avèk bann zéksploitèr la rishès in pèp. Pardon éskiz si moin na poin kèr klèr dovan in n’afèr konmsa ! Kolonialism-la, la pi d’fin don sa !

Justin