Mésyé, médam, la sosyété, mi pans zot i koné kosa i vé dir manj o pyé. Pou lo ka zot i konétré pa, lé pli préférab mi asplik sak mi konpran kan mi di sa. Figir azot kan moin lété anko fèb, moin té i yèm bien avèye bann travayèr kan zot téi vien travaye dan la kour. Lété a popré toultan lo mèm moun. An parmi l’avé in sharpantyé demoun téi kriye ali « MAMA ». Lo MAMA an késtyon té i yèm kozé mèm si li téi bégèye in pé bokou.

Donk in zour MAMA té apré rakont son souvnir kan li téi travaye pou in mové péyèr é li té apré asplik koman lo patron la raz a sèk in dalon ali-la pa pèye inn tyork ! L’èrla mon papa i domann ali si li osi li té pa péyé. Ala ké li réponn : « Moin la manz o pyé ! ». Donk li téi vé dir li t i domann l’avans shakéstan pou pa pèrd tout. Donk li téi fé pèye ali firamézir lo travaye téi avans in pé é pa kan travaye té fini . Donk li téi manz a krédi !

Pou kosa mi di sa ? Mi di sa pou l’imanité. Zordi nou la pankor pass sète moi é nou la fine kon some pou in lané déza nou la. Zordi la fine konsome la totalité sak la tèr i produi dann in n’an. Si tèlman talèr, in sèl tèr nora pi asé pou nou, nou lé fine ariv a konsome 1,7 foi la tèr é nou la pa fini pars olèrk fé zékonomi, olèrk diminyé nout konsomasyon ni fé arienk goumanté.

Ziskakan nou v’alé konmsa ? Lé vré nou la pa nkor fini nout dépans initil mé v’ariv in zour nou sar blijé, ni vé, ni vé pa, diminyé nout konsomasyyon. Kan v’ariv tan-la in pé va kontinyé manz an koshon alé oir in pé-in bonpé mèm - va sèr z’ot sintir é pou arvir dsi nout konvèrsasyon an-o la : Oplis v’alé, oplis l’imanité va manj o pyé é mi pé dir azot sa sé in n’afèr i aranj ar pa nou ditou.