Matante Zélida la ékrir Justin :

Mon shèr nové, mon spès salté,

La pa zot mèm, bann rouj-de-fon, té i di, lo shanjman i komans jordu ? Si sé zot, mi pans, pou mon par, lo shanjman la komans dopi 2009. La prèv ? Ala in titr zournal la Frans k’i di konm sa : "Ayrault i anons la prolongasion bann mézir la pran apré la kriz 2009". Bin kisa té o pouvoir l’ané 2009 si la pa lo pti prézidan épi son gouvèrnman ? Donk Ayrault la prolonz bann mézir la droit laté fine pran, donk lo shanjman l’avé komans l’ané 2009… é pa l’ané 2012. La pa pars la di lo shanjman i komans l’ané 2012 ké li la komans pou vréman.

Tok ! Pran sa pou toi !

Justin la fé pou répons :

Mon vié matant k’i koz touzour la boush rouvèr,

I pé dir, ou i koné tourn lo fèr dan lo boubou, é pli pir, ou i koné bien l’androi k’i fé mal. Poukoué ? Pars sak JM Ayrault la di lindi la pa ditou lo shanjman bann Rényoné té atann. Sak té i fo, pou moin, pa solman pou moin, sé in gran plan pa arienk pou lo sovtaz l’ékonomi — in l’ékonomi dan la kriz ! —, mé pou bien mèt nout l’ékonomi dann shomin dévlopman... Matant, vi koné mon parti in foi an plis la fé son bann propozision, li la mèm di sa lé bien nésésèr, mé inn foi an plis la pa ékout ali. Dan l’Outre-mèr, lo gouvèrnman i dans dsi in volkan é i diré li rann pa li kont. Pli pir, li anvoy in moun l’Outre-mèr pou ankès lo kou kan v’arivé. Lé vré, bann mézir la pran lé konm in kopié-kolé sak gouvèrnman Fillon noré pri si li té ankor an plas. Donk, ankor in kou d’manké ! De kou d’manké an kou d’manké, nou va fini par shaviré. Tout fason, di aou bien, la droit osi lé koupab pars lo plan 2009, sèt Sarkozy la anons lo sis novanm 2009, la pa trap lo débi di komansman d’son réalizasion.

Tok ! Pran sa pou ou !

NB : Gouvèrnman i pans l’Outre-mèr, li osi, i doi pran son par dan l’ostérité. Lo problèm, sé ké oplis i sava, oplis nou lé dann bout roulo.

Justin