Oplis i shanz, oplis lé parèy !

I prétan dir, dann dizuitième sièkl, zirof sa té i trouv an kantité dann bann zil Moluques*, é lété la Olande té i kontrol komèrs-la : banna té i anpèsh distribié boutir dann d’ot péi. Mié k’sa, konm dann l’il Ambon té i produi plis zirof lavé bézoin dann bann péi l’Érop, bann Olandé la tié tout plantasion lavé dann lo rèstan bann zil.

Zot va di amoin, sa té in n’afèr dann tan lontan, koméla, zamé noré pa fé in n’afèr konmsa ! Sof ké, koméla ankor, kant in bann sosiété kapitalis i romark zot lé riskab pèrd larzan, zot i détrui sak i fé azot konkirans. Zot i pé mèm fé fèr la guèr si na poin in n’ot manièr.
Zot i koné promié loto la dépass san kilomète a l’èr lété in loto motèr éléctrik : konm té i doi vann pétrol pou gingn lo voul an kantité, é bin, l’arète fé bann loto éléktrik in bon pé d’tan pou fé bann loto i marsh avèk lésans.
Nana lontan, in linvantèr la fé in lanp éléktrik i iz pa. Kossa la fé ? Bann fabrikan z’anpoul l’ashté lo brové épi la fèrm ali dann in kofor la bank. Konmsa, zot i kontinié fé larzan avèk z’ot zanpoul fé pou pa dir lontan.
Dizon, plis lo tan i pass, oplis i shanz. Oplis i shanz, oplis lé parèy ! Fransh vérité !

* sa in péi i fé parti l’Indonézi, sa.

Justin