Matante Zélida la ékrir Justin,
Mon shèr nové, mon spès salté,
Zordi moin nana in bon nouvèl pou ou. Mi sort lir sa dann mon zournal proféré... la pa dann out shifon rouj : i prétan la mérès Sinpol la fé ashté in loto pou son foncsion. É la pa in pti voitir, siouplé, vik la pèy sa 80.000 leuro. Dizon in loto an or. Aprésa, alé rakont zot balivèrn, zot sornète avèk kissa zot i vé, konm zot i vé... la pa in fam konm moin zot va niabou anbrouy léspri. Alé, bouz aou la !

Justin la fé aèl pou répons :
Mon vié matant, out kozman i étone pa moin. Si i ramas in mantèr par-la, ou sé la promièr pou gobé ! Alor, mète bien sa dann out trou d’zorèy : loto-la la pa kout 80.000 euro, mé in pti pé plis 30.000. I fé in bon diférans ! Solman, mi an vé pa d’ou, sak mi domann amoin, sé pou kossa in zournal i fé son sérié i sar rod son zarguiman dann kanal épi i vérifié pa son zinformasion.
La pa promié foi, sar pa dèrnié ! La pa in sèrtin Joseph Goebbels* téi di i fo ramas mantèr, i fo fé bann gro mansonz ! Oplis lé gro, oplis demoun lé riskab kroir !

* sa té in minis Hitlèr d’apré sak i prétan.

Justin