Matant Zélida la ékrir Justin :

Mon shèr nové, mon spès salté,

Zot i pans, sé zot, bann rouj-de-fon, la romèt maloya anlèr. San zot, maloya nora fine tonm rèd mor. Sanm pou zot, lo konba lé fine gagné définitivman. Poitan, moin na l’inprésion l’opinion lé pli rézèrvé ké zot i kroi. Moin la antann dann Rénion promièr dé-troi kozmann moun i di konm sa : zot i konpran pa poukoué l’UNESCO i fé in ka avèk maloya, épi i fé pa d’ka èk tout sort kalité mizik nana shé nou. In pé la di, sa sé i n’afèr d’politik pars bann rouj de fon la baz zot révèy kiltirèl dsi maloya. Moin pèrsonèl, moin la vi maloya nana dé-troi zour solman. Avan sa, kan moin lété jèn fiy, té i dans in pé dsi tout mizik é lété bon pou nou, lété kréol sansa rényoné pou nou. Mi pans zot l’avé poin arien pou anvié maloya. Tok ! Pran sa pou toi !

Justin la fé pou répons :

Mon vié matant k’i koz touzour la boush rouvèr,

Moin la fine antann kalité kozman konm sa dan la boush in bonpé d’moun. Souvan dé foi, mi majine moun-la l’apré sèy désid par li mèm kosa lé kréol é kosa lé pa, kosa lé rénioné é kosa lé pa. Pli pir, zot i akiz lé zot — sirtou bann PCR — i shoizi dan nout kiltir, i pran in pé, i jèt in pé. Sa in drol fasonn oir lé shoz pars, pou moin, oplis in kiltir mizikal lé rish, oplis li lé valab. Mié k’sa, oplis nana la rishès, oplis la kréolizasion lé intérésan. Maloya té i sar disparèt, sa toulmoun i koné, é Parti kominis la ankouraj ali, é l’arivé sak l’arivé. Astèr. An finn kont, toulmoun lé pa oblijé èm ali mèm si i rokoné sa i fé parti nout kiltir. Astèr, sak i èm maloya, li krash pa non pli dsi lo séga, dsi bann mizik lé o, é tout sak i fé nout patrimoine mizikal. Solman, toulmoun i koné, pou l’UNESCO i fo fé in dosié, i fo bien prézant lo z’afèr. La fé pou lo maloya : lé bien bon. Akoz pa pou lé zot mizik ? Sak na kouraj, i fo li mèt ali o boulo. I gingn pa arien san rien. Sak lé parès i rès atèr. Tok ! Pran sa pou ou !

NB : Ala sak moin la lir dann Facebook. In moun la ékri : « Mi vien regarde le reportaj dessi Réunion Première dessi Maloya, i sanb pou mwin zot la oubli in nom inportan dann la rekonéssans le maloya konm patrimoine lunesko : Carpanin Marimoutou. Li la sobat pou se rekonéssans la. Mwin lé an kolèr akoz zot la bien oubli se boug la ».

Justin