Nout toute lé dann minm bato. Na poin lontan, moin la antann sa dann la boush in gran patron. Byin antandi, aprésa, li la anvoy son romans, konm de koi, dann la mèr déshéné, lo sèl fors l’ékipaz sé son solidarité. Bon ! Byin bon, é mèm byin di ! Mé ousa i lé la vérité, dann tou sa la, kan dann lantropriz i konsidèr bann salaryé konm étan in sharj plito k’in z’atou, kan i profèr goumante la prodiktivité mèm si bann travayèr lé riskab kraké... in pé mèm i mète la korde. Armète èk sa bann délokalizasyon, é bann z’aksyonèr, k’i rode solman pou gonf z’ot pla. Arzoute ossi la fasson i trète bann travayèr la pa loin gingn l’az la rotrète.
Na dé-troi zour, si mi tronp pa, dann in vil i apèl Strasbourg, in l’antropriz la domann bann travayèr pou partisipe in votaz pou k’i diminyé bann salèr, épi lo nonm zour la RTT. Bann travayèr la voté, la aksèp sak l’antropriz la domandé, san ète sir san pou san ké l’antropriz va kontinyé son shomin. Pou kossa ? Pars banna la di, i vo myé fé sa ké grandi la ké dovan l’ANPE... In madam, pou son par, la di : « Akoz kan lé shoz té i marsh byin la pa domann bann travayèr si zot té i vé in rogoumantasyon pars, kite pou voté, i fo fé vote pou lo mové, konm pou lo bon ! ».
Byinsir toute l’antropriz la pa parèy. Byinsir toute na poin lo mèm règloman. Mé lé blizé rokonète in bon pé la profite la kriz pou manz la lène déssi lo do bann travayèr. Tanka lo koméraz bato é la solidarité, i fo romarké, oplis k’i sava, oplis sa lé mantèr.*

*Mi pans pa bann travayèr “Le Quotidien” lé riskab di lo kontrèr !

Justin