Mésyé, Médam, La Sosyété, koz èk moin sé koz èk in kouyon, mé sé o pyé d’lo mir k’i oi lo mason. Mé zami, moin la fine anparl kozman-la, mé in dézyèm koush i pé pa fèr d’mal. Pou koué mi di sa ? Pars oplis i sava, oplis la modésti sé in marshandiz lé rar. Désèrtin i pans i sifi in lovyé pou soulèv la tèr, sansa zot i pans na poin lanspèk lé kapab kal azot. Poitan si ! Astèr in n’afèr sé oplis ké ou i mont oplis lorgèye i mont dsi ou é oplis i oi out bann défo. Si ou sé in pti kolon normal, pèrsone i vien pa tir lo pou dann out tète sirtou si la poin shové. Mé si ou i sort out kondisyon pou mont pli o, lé posib-lé pa sèrtin-out shoviy i gonf si tèlman out bann zami i rokoné pi ou. Sa lé bien vré élas ! Lé bien vré ké d’moun la ote i amontr plis zot défo firamézir zot i mont. Alé ! Kroi si zot i vé, kroi pa si zot i vé pa, mé méfyé azot kant mèm de zot konm mi méfyé amoin de moin. Mi kite azot rofléshi la dsi é ni artrouv pli d’van. Sipétadyé.