Mésyé Didier Robert i pans l’état lé ostil par raport la Réjyon Rényon, sansa La Rényon tou kour, la mèm shoz solon li. Solon li gouvèrnman fransé i amenn in politik lé pa bon pou noua lé oir li si li l’avé lo droi li n’oré amenn in bonpolitik pou La Rényon. Solman mi èmré li fé pa pran anou-konm kréol té i di lontan-po d’shanm pou pla kouvèr.

Ni koné bien son bann projé é ni koné bien soi sa la pa bon pou nou é sa i mète an danzé nout l’avnir finansyé, konm l’ékilib nout l’anvironeman. Ni koné osi désèrtènn promès la rès dann karton épi lé pa paré pou rosortir. Parl pi bann bon projé la réjyon avèk Paul Vergès l’a nyabou mète an plas épi la mazorité Didier Robert kisoi la mète an somèy, kisoi la roganiz pou zot in l’antèrman an promyèr klas.

Kosa lo gouvèrnman fransé la fé par raport in politik konmsa ? Li la mète lo o-la ? Pa ditou, li la mèm ankourazé. Li la tienbo kont l’avi bann komité l’anvironeman ? Pa ditou, li la di sak la fine komans i fo anshevé. Li la fé in l’odit lo bann finans la Réjyon, konm li té i doi fèr, Pa ditou, li la rofiz fèr. Kosa li la fé pou l’énèrji la mèr ? Pa ditou.

Pir ksa, nou rényoné nou na konm l’inprésyon l’éritaz Paul Vergès l’a été gaspiyé, partazé rant désèrtin san ké lo gouvèrnman i lèv lo pti doi ; donk mi oi pa l’ostilité la-danh, mi oi sirtou la konplisité. Ostil o sinonsa mèm konplis ?