Mé d’apré sak mi rapèl lété bien difissil trouv in solission an déor d’in propozission lo parti kominiss rényoné l’avé fine fé, é souvan dé foi li la fine si tan tèlman propozé ké lété dir trouv in méyèr solission-pli pir lété possib. La prève ? Toute zafèr torte issi La Rényon.

In zour mwin la antann in om politik apré dir lo parti kominiss noré té pliské rish si li lété péyé pou son bann zidé. Fransh vérité li l’avé bien rézon, mé li l’avé poin rézon konte lostracisme in pratik k’i konssist a done tor kélk’in lé dann lo mové parti… dizon li lé pa an figuir d’sinteté pou lo pouvoir néo-kolonyal.

Wala sak i fé ké koméla néna in bonpé zafèr torte-torte issi La Rényon pars parti kominiss momandoné la propoz in bon solission é pou lo pouvoir lokal épi lo gouvèrnman é pi ankor pou bann parti la droit lété par définission in mové solission.

Zot i vé inn-dé zégzanp ? Mi pé dir azot sa i manke pa !

Astèr ni viv an plin dann in sityassion lé riskab fèr d’tor noute bann zanfan sirtou sète bann klass popilèr souvan défoi léssé dsi lo bor d’shomin. La rantré i ariv é toulmoune i koné sa i koinsside avèk kissoi in pèryode shalèr in kroiyab, kissoi in sézon gross plui, kissoi ankor la pèryode la maladi moustik.

Biensir lo Parti la touzour di lo lané skolèr lé mal adapté par rapor lo travaye bann marmaye, bann zamontrèr épi bann paran épi lo pèrsonèl lédikassion nassyonal. Mé wala konm sé lo parti k’i propoz sa dopi plizyèr dizène zané ébin sé in mové solission. Ariv in zour afors alé a lo kalbass i kass.

A bin antandèr salu !

Justin