Témoignages - Journal fondé le 5 mai 1944
par le Dr Raymond Vergès

Lakey lo sit > Chroniques > Oté

oté

zedi 24 désanm 2020, sanm Justin

I paré dan la frans laba, dann Paris d’apré sak i di néna in l’éspozison bann fonnkèr péi l’outre-mer et d’après sak i di na poin in sèl fonnkèr, in sèl fonnkézèr rényoné banna la nomé . Mi koné pa si i fo dir domaz, sansa mi s’anfoutsa, sansa ankor mi profèr nout bann poète i trouv issi shé nou nout prop kondidérassion é mèm kékfoi nout l’admirassion. Mi koné pa mé mi pans sa i doi dépand bann santiman lé z’inn épi lé zot : pé s’fèr in pé i trouv sé in n’afèr domaz sansa néna in gro rogré é mèm in ène dann kèr. Mézami, m’a dir azot, fransh vérité néna zolil zoli fonnkèr issi dann nout péi –i di pa Bourbon sé l’il bann poète ? Néna zoli fonn kèr shanté, néna zoli fonnkèr réssité. Néna zoli fonnkèr an fransé, é néna zoli fonn kèr an kréol rényoné. Si mi di azot mon proférans lé pou bann fonnkèr dann kréol rényoné, lé possib in pé lé riskab zir mon momon-sansa mwin mèm, alé savoir.. Shakinn i priyèr pou son shapèl, mwin mi priyèr pou bann fonnkèr dann kréol rényoné.Sé pou sa, asoir mwin la parti rode dann in liv Alain Armand épi Gérard Chopinet in fonnkèr Axel Gauvin la ékrir néna in bonpé d’tan, mé konm k’i diré i gard zordi tout son fréshèr tout son jénèss. Lir sa marmaye, mi pans zot ossi ot va bien èm fonnkèr-la.Li apèl : »i di kaf néna sète po »
Justin

I di kaf néna sète po
I di kaf néna sète po. Soidizan inn pou gro transpirasion ;dé pou divé kann, troi pou gratèl fourmi, l’ot ankor pou travaye dann kèr poikan solèye inèr,lo sizièm pou kapkap la bon-o la Plène. Lo dèrnyé pou nèrf bèf madam Desbassyns, dé troi gro blan la séré,somanké « lo tan lontan » i arvien.
In po, in soufarns, in martir...
Si lé vré lo sète po, akoz pa inn pou sof solèye asiz dsi la rosh piké, dé pou la briz de mèr dann l’onbraz filao, troi pou la karèss fèye fanjan dann la foré Bélouv, l’ot pou la rozé l’èr ti kavkav i lèv,l’ot ankor pou lo frolé péroké kan la lam i dévir, lo sizièm pou lo fré la kaskad basin blé, lo dèrnié pou la po in zézèr ninportékèl koulèr
Sak po, son gadianm, son kalou dan la vi.
In fonkèr Axel Gauvin


Inn modékri, inn ti lavi, inn komantèr ?

signaler contenu


Facebook Twitter Linkedin Google plus