Alé, aminn mon linèt, moin la bezoin ékri Justin po domin. Aprè i fo nou manz avan dalé lermitaz po zot kanpé !

Non, moin na in souvnir ; mon momon té i di a moin souvan, kan el i wa moin la po grat mon boyo ou bien po fé in naktivité i raport pa arien ;  « alé trap in liv, lir, si ou na poin rien dot po fé ! »

La, minm in paran i koné pa lir, i pé dir son prozénitir (zanfan) trap in liv, lir, minm si lo paran i koné pa lir !

Troman di trap in liv zéografi, in liv listwar, in liv sians, in liv an kréol, ou sinon in liv langlé, dan ninport lakel oua trouv keksoz po aprann.

In moun kelké soi son laz, li pé trouv keksoz dintérésan dan in liv.

Minm in kont po zanfan i pé révéy son bann lémosyon.

Mi rapèl kan moin la rant an sékond, in kamarad la Rivièr Sinlui, oté lo boug lanni inspéktèr, i di a moin Jack London, ek tout son bann liv si bann lou Kanada "Croc Blanc", moin té koné pa, lamitié, lintélizans sertin zanimo po lo zonm, inn i protèz lot ; ek sa lanvironman lé ostil, pa riink zanimo kome lours mé i pé èt osi bann moun dan la foré i rod trap out larzan…

Oui lir sa, ninport kel az ou trouv sa gayar po lespri, po out kiltir zénéral, an plis, minm si ou lé kondisyon modès, din in léktir, ou na poin bézoin larzan po voyazé !

Si ti vé alé an Russie, lir Tolstoï ; ti vé alé Zétazuni lir Steinbeck, ti vé alé Brézil, lir Jorge Amado, ti vé alé Langletèr lir Charles Dickens, Shakespeare ; la Rénion, lir Daniel Honoré, Axel Gauvin, Sam Long…

Si ou na poin rien po fé, trap in liv, lir !

Justin