Si mi suiv désèrtin, sanm pou moin zot i yèm doudouiz anou in pé, bokou, a la foli. I diré rogard la vérité an fas sa sé in n’afèr i plézir pa zot. Zot i profèr la vérité kan li lé makiyé.

Fitintan, in pé té i vé demoun i gnor l’ésklavaz é mèm son l’abolisyon. Sé pou sa zot té i vé vin désanm i transform an fète létchi. Aprésa zot la komans dir l’ésklavaz isi dann péi bourbon lété pa in n’afèr dir pou vréman : zot téi invite anou bien rogard son koté imin.

Kan, dann l’ané 1982, gouvèrnman la désid fé avèk vin désanm in fète l’abolisyon, ala k’in pé la trouv té plito valab fé in fète komèrsyal. Pézapé, komers la rouvèr, grann sirfas la rouvèr é lo zour soidizan fèryé la vni in zour d’arzan pou bann kapitalis.

Aprésa, kan la fè la désid fé in komémorasyon bann l’abpmilisyon l’ésklavaz épi la trète bann noir, in pé la mète a kriyé gouvèrnman i vé diviz kréol, aardrèss inn kont l’ot, ankouraz la guèr sivil. Aprésa la pass la pintir la dsi pou pa k’i oi koman lésklavaz épi la trète té in n’afèr vyolan.

28 oktob i tonm in d’lite pou bann lang épi bann kiltir mé vite fé la transform sa an fète komèrsyal é tout in somenn l’apèl sa la somenn kréol : folklor, manzé, mizik, étout lo tanbloman an oubliyan la lite.

Si tèlman ké banna i komans par énèrv amoin kan zot i ral nout konba an aryèr, kan zot i doudouiz anou, kan zot i folkloriz anou. Bann lanspèk va ! Arète folkloriz anou !