Poitan, péi-la noré bien fé tir losson la guèr vietnam. Mi rapèl mwin lété laba dan La franss é mwin té rogard la télé avèk in bann jenn, la plipar demoune la droite é kan l’amontr in gran bato amérikin apré fé kour in pti bato vietnamien, toulmoune la bate la min sof inn-dé kréol té la pars, nou téi di rantre nou, néna in zour i apèl demin. Bann batèr d’min téi panss an de tan, troi mouvman bann kominiiss vielnamien téi sar gingn galo mé listoir l’amontr anou kékfoi lo po d’tèr i gingnn kont lo po d’fèr.

Néna kékmoi an dé kou d’bonbardaz lamérik épi Israel la tyé tout la dirékssion politik l’Iran. Mi rapèl bann zoinaliss la aplodi. Pou zot lété fini avèk lo réjime ayatollah. Fini pou li avèk in bon travaye léspyonaz épi lo kou déssizif. Kékmoi apré oussa ni lé ? Néna in péi i apèl l’Iran i kontinyé rézisté épi in gran péi i apèl lamérik l’apré rode san trouvé in manyèr arèt la guèr é li trouv pa.

Promyèr armé di mond ! Promyèr piuissans di mond é toussa pou kossa ? pou in bann guèr i arète pa, épi la viktoir k’i ariv touzour pa… Sé pou sa mi panss provèrb lil Maurice k’i di sak mwin la mark an-o la é k’i vé dir in problèm li doizète analizé dopi A ziska Z avan prann in déssizyon. Sépa sak lamérik la fé é bon devinèr sak i pé dir amwin kossa i sava éspass demin.

A bon antandèr salu.

Justin