Dédé Lansor au micro.

Mi mark in SMS mi vyinn ginyé i sort èk Gaël, in kamarad a li : « Dalon, dalone, in movèz nouvèl pou anonsé. André Payet (Dédé Lansor) la désot la vi. In dalon la kiltir, in dalon maloya, in militan la vi.

Lo vey pa avan domin (a swar mardi a partir).

5 bis rue du docteur Henri Roussel, 97430 Le Tampon — pa loin marché couvert et gare routière-NDLR). Rès informé. Nou artrouv. Gaël ».

Moin té dan in rényon lo Por kan moin la antandi la nouvèl.

In shok. In bononm pa vyé vyé, ankor byin dobout, aktif. Sa i fé la pèn…

Mé konm nout tout ni doi mourir in zour, i fo nou tash moyin armont la pant.

Nou di Laurita, zot ti garson pran kouraz, tyinbo, larg pa, nou lé èk zot pou kontinyé la lit, la lit pou lidantité kréol, la lit pou nou konèt é fé konèt nout bann désandan listwar nout péi, nout lang, nout konba.

Oté Dédé, ou lé pa mor po nou, ou sra touzour dan nout kèr, ou la été in légzanp pou nou. Nou va kontinyé viv dan lo son ton bob, dan lo liv toué la tradui, toué la ékri, pou lo bann zénérasyon toué la formé èk ton filozofi.

Dédé Payet, in dalon la désot la vi.

Justin