Mi sort antann in n’afèr lé bèl pou vréman.I paré i mank anou galé pou fini la rout an mèr. Konbien i mank ozis ? Moin la fine antann di plizyèr kantité. Mèm zour moin la antann i mank troi milyonn tone édmi, épi moin la antann i mank onz milyonn tone. Ni sava pa shipoté pou inn-dé milyon anplis - an moins. I mank bèl-bèl rosh an touléka !

Prézidan konsèye réjyonal pou son par la di konmsa li la fine komann in l’étid é d’apré son létid néna asé zandin, dann karo la tèr bann plantèr pou anshèv la rout an mèr. Kisa ou i sava kroir ladan ou ? I diré kaziman in kalkil konm i fé shak ané pou mézir lo trou la sékirité sosyal. Dann sète afèr-la i mégote pa : sèl zafèr ni pé dir sé ké an o lyé demoun lé pa tro doué pou konté, pou méziré, pou kalkilé.

Momandoné la fé vni galé dopi Madégaskar : la pa fé vni in ta, i paré arienk karant sink mil tone apré l’arété. Pou kosa ? Pars in pé la di alé rode galé Madégaskar sé kaziman vol bann pov malgash.I paré osi néna laba bann vyé rèss la mikrobi antéré é lé riskab amenn tout sort maladi isi shé nou. In pé i di galman – bann transportèr-si i pran bann rosh Madégaskar, i débark dirèk dsi lo shantyé é alor bann transportèr i di kisa i pèye anou pou in travaye nou la pa fé ? Pran rosh ousa zot i vé, mé an rotour i fo gonf in nout pla.

I pé pran Moris osi alor ? Péna problèm, inn foi lo posh bann transportèr lé gonflé é pou la poul zèf an or, va rovann bann kamiyon dé san mil éro l’inité. Inn dan l’ot bann groupman kamiyonèr i artrouv zot bèr-ki bate dobèr lish son doi !

Mé final de kont si nou sé bann bon fransé, si sak gran papa kolbèr, la lèss anou son pansé an éritaz afèr alé rode Madégaskar, afèr alé rode Moris, afèr alé rode ninport ousa ? Afèr, sinploman, ni fé pa vni galé d’ Frans ? Ala in lidé k’èl lé bone la ! Ala in lidé k’èl lé bèl ! zot i pans pa ?