Mézami, mi koné déssèrtin plantèr i garde zamé la line kissoi pou planté kissoi pou gréfé, kissoi pou tayé. Mi koné d’ote i manke pa rogarde la line kissoi pou planté, kissoi pou tayé, kissoi pou gréfé. Mi koné pa kissa i gingn pliské l’ote.

Mon papa téi rogarde pa la line, pars pou li sa sé in zistoir lontan é koméla néna toute sorte trètman alor lé pi nésséssèr fèr in konte avèk la line.

Oziss zot i koné néna déssèrtin koifèr i koif la nui la line montante konmsa shové i pouss myé. Zot i koné ossi la nuite la plène line néna i trouv pa somèye. Sirman zot i koné d’ote shoz dsi linflyanss la line sansa non.

Antouléka mi trouv sré bète dir la line na poin okin infliyanss dsi nou bann tèrien, konm dsi bann plante épi dsi bann zanimo mé pétète zot i panss konmsa é ni pé koz ankor la dsi. An atandan ni lèv lo kan épi ni rotrouv pli d’van sipétadyé.

Justin