Tou lé zour, shak zour, lo bann tète zèf i sort anou zot boniman, i di anou tout in bann shif san dir anou koman i dékode sa, i rakont anou Gasparin, Brunet, i di anou dé shoz zot mèm i konpran pa, é sirtou i di anou sort pa dann nout kaz é i fé port anou lo shapo d’in nafèr ké nou la pa fé… Ni pé di an nou mèm si solman l’avé ékout anou, si solman l’avé pa fé rant isi tout in kantité d’moun kontaminé, si l’avé trète anou konm Sin-Pyèr épi Miquelon dopi l moi d’mars, nou noré pa été randi l’androi nou lé randi.

Mé par l’fète, ousa nou lé randi ? Kisa i pé dir anou dann kèl létap la maladi nou lé fine arivé ? Pèrsone sirman. An touléka pèrsone isi shé nou La Rényon.

In foi néna inn la di konmsa nou lé an rotar inn somenn sansa dé par raport La frans – la pa di anou kèl bout La frans ! la pa di anou si sé dann lé zalantour Lil de frans, si sé lo gran est, si sé in n’ot bout. An touléka sa i vé dir si banna la pankor trap lo pik - i di plato koméla - nou lé ankor pli loin… Pèrsone la pa di anou si lo salté d’maladi la fine trouv son bann mark isi shé nou-si li la fine instal ali pou vréman pars kan i di néna solman trépé d’ka otoktone, é la plipar d’ka lé inporté, ni pé dir li néna ankor son tourné-viré pou fé dann nout péi.

A ! biensir, zot i pé dir amoin, mi rode lo pou avèk lo lant dann koko la poin shové. Zot i pé dir amoin si néna bann tète do zèf, prézidan la anvoye pou nou, i fo fé konfyans banna. Mé mi pé dir azot, pou moin, konm pou in bonpé d’moun konfyans lé mor. Alor, parl pa moin konfyans !

Konfyans dan ki ? Dann in péi i ariv mèm pa fé fabrik bann mask pou anpar la maladi-alé oir néna in lizine i fé sink mil par zour tèrla moris. Alé oir Madégaskar néna lizine i fé par milyon !* Kon fyans dann bann boug l’apré bataye inn avèk l’ot konm shifonyé pou fou o dyab médikaman lé zot la trouvé. Fé konfyans in gouvèrnman i profite la maladi pou kass nout libèrté, pou kass nout droi, an touléka lo pé k’i rèss.. Léspoir, léspoir dan ki ? Léspoir dann in pé d’moun l’apré rode anmashine anou avèk in téléfone portab. Konm i di, koku, batu, kontan…

Mé zami, i paré disi lindi néna in prézidan va anons anou nout libèrté lé bridé pou dé somenn ankor épi li va dir anou pou kosa, - pou nout bien soidizan ! Mé sirman li sava pa dir anou kèl létap la maladi nou lé fine arivé pars li osi li koné pa é tout fason si nou lé pa kontan nou na ka pran konstan. Nou na ka atann la vag. Atann la vag ? Bin oui, pars la vag la pankor arivé. Pé s’fèr moin néna rézon. Pé s’fèr lo Tsunami lé pankor arivé ! Kosa zot i anpans zot ?