Kan i di sa i parl in pé tout marshandiz késtyon pou bann péi d’érop fé zot bèr dsi lo do bann péi moinss dévlopé ké zot. Biensir si lakor lété pa gagnan-gagnan pou lérop nora pa signé. Mé oila anparmi bann marshandiz néna galman bann sèrviss é sa i aranj azot bien vi k’sé in manyèr konm i di pou taye la lène dsil’do bann mouton moinss dévlopé.

Zot i oi zot intéré mé sé pa si zot i oi lé n’ot. Sépa si zot la domann azot si La Rényon épi d’ot téritoir loutremèr téi trouv zot intéré ladan. Domaz mwin la pa antann La franss koz in pé for pou défann anou konm li la aksèp fiziye nout prodikssyon kann avèk dosik é ni oi zordi nou lé dann bo dra pou vréman.

Antouléka déssèrtin la pèr bann péi konm Madagaskar, Moriss épi d’ot i ruine nout bann sèrviss pars in pé i di dsi la késtyonn sèrviss banna i gingn fé myé ké nou é mwin shèr ké nou. Si lé vré va rèss anou nout larm pou pléré épi bann transfèr larzan pou assir lo mintien nout réjime néo-kolonyaliss..

Amwins ké l’IA i ranplass anou, i ranplass galman bann zaktèr dann péi mwinss dévlopé ké dann l’érop é final de kont l’APE sèrviss sar ankor in gob moush dsi nout shomin épi dsi sète nout bann voizin. E lérop plito k’ède anou nora plito koul anou, fé plonj anou ankor pliss..

A bon antandèr salu !

Justin