Kossa in shoz ? dolo débout ? Sa kann sa, pou moin !
Solman, antansion ! Na poin arienk dolo dann kann ! Agard in kou dann intèrnèt, zot va oir koman dosik, la mélas, sinon sak i apèl bann la bou nana in konpozision intéréssan : i diré boit médikaman par zot mèm. Tansion, na poin arienk zafèr pou adousi kafé, in ! Nana in ta èk in paké zafèr anndan. Zordi, ni fé pa lo komansman la moitié sak na moiyin fé ansanm kann d’apré sak i koné zordi, san kont sak lé kapab trouv an plis pourvi k’i rod, pourvi k’i mète bann savan ansanm dann bon kondission, dann bon laboratoir, pou rodé.

Alor, lé ga ! Kan i di karo kann La Rénion lé riskab disparèt, rienk akoz lo pri losik i sava béssé, mon san i bouy. Oté ! Nou lé dann in koloni pou vréman ? Bin, afèr tout sa bann marmay instruiyé nou nana issi ? Si la-dan i dégote pa in larmé savan, téknissien, manazèr, moun kapab, pou mète an valèr nout rosours natirèl, pou tir sak nana dann kann, pou transform sa an l’or pou nout péï.
Solon moin, la pa larzan i mank ! Léspri bann désidèr k’i désid pa arien lé tro kourt ! Fransh vérité !

Justin