Si mi di azot shanté — la, dann tan li l’é éné, la konm i di kass vréman bann kode nout mizikolozi é kan mi ékri sa mi rapèl bann shanté dann tan La Rényon sak lété in pé a lo d’roz mé kan mwin téi antann dann mon zorèye lo shanté mi anparl azot mi san in souf nou téi san pa touzour avansa dann lo répèrtoir bann shantèr é bann shanté nout péi. Sé konmsa mi rossan sète afèr-la lo tan la révolission mizikal é poétik avèk in bonpé group jenn shakinn rante nou la bien konssèrv lo nom épi lo répèrtoir dann son mémoir.

Sarda Garriga la aboli lésklavaz La Rényon. kèl gran om ! Li la mète in poin final-prèsk !- avèk in sistèm an parmi lo pli inimin in puissanss kolonyal la fé sibir demoune in péi.la fé sibir noute bann zansète rényoné… Mé lo shanté ni anparl i di pa lé shoz konmsa, an kontrèr ! li di oté Sarda toué la roul anou, ton zoli kozman roul anou dan la bou. Dann tan mi anparl azot shanté-la téi pran lo kontre-pyé sak bonpé rantre nou téi panss. Inn manyèr pou li kass lo kode nout mizikolozi par son parol, par son mizik épi par linterprétassion konm mwin la di pli o, dann tèks-la.

NB-Ziskakan té kréé lané 1979-i anparl sa néssans konm in révolission kréol — mé d’ot group lé éné galman konm Oussanisava, Bastèr, épi d’ote ankor mi panss sré intéréssan d’anparlé. In zour kissa i koné…… Zot ossi la kass lo bann kode l’avé avan. San konté la ronéssans lo maloya avèk bann maloyer ni koné ankor bien zordi-toute bann gramoune épi zot déssandanss antouléka pou sak lé ankor an aktivité. San obliye Daniel Waro bien sir.

A bon antandèr salu !

Justin