Oté Sarda toué la roul anou, ton zoli kozman roul anou dan la bou !

30 zanvié, sanm Justin

Mézami, si konm mwin zot i suiv in pé zot faktir léstréssité, mi panss tazantan zot kèr i doi bate dan zot do si tan tèlman léstréssité la rogoumanté sa i fé kant mèm karante pour san an in ané a pène. Mi koné plizyèr pèrsone, la rotrouv azot avèk in dète kouran in bonpé shèr.

Lé vré bann minis la di anou épi la rodi si ni pèye pa tro shèr lo kouran sé ké néna in pérékwassion rante lo pri kouran an Franss épi lo pri kouran issi La Rényon. Sa i fé dir amwin si gouvèrnman l’avé pa sabote noute lotonomi énèrzétik é bin nou noré pa rotrouv anou konm koméla la tète dan l’arozoir.

M’a rotourn in pé dan tan Paul Vergès ; pa pou dir toute lété, toute lété zoli, mé sinploman pou rapèl in pé momandoné la Réjion la fé in program pou nou gingn lo sho san prèss dépanssé mé antouléka noute faktir lo gaz épi kouran dann tan-la l’avé pa tro goumanté.

Aprésa kan bann avèk la Réjyon, la lanss in program lotonomi énèrzétik nou l’avé bonpé léspoir avèk sak nou téi apèl noute miks énèrzétik avèk solèye, la mèr, lo van, lénèrzi volkan — pa tro dépanss kouran épi favoriz inpé toussa bann moune La Rényon lé an difikilté d’larzan. Epi zo la pa pèr lo progré.

Zordi, avèk sak i ariv anou, avèk zot pérékwassion épi zot déviraz lo do par raporte noute lotonomi énèrzétik, ankor in foi ni panss gouvèrnman la roul anou — konm Sarda la roul bann zésklav ép la done azot in fo libèrté. Mé pa zordi, pa domin, v’ariv lo jour noute solission lotonomi énèrzétik va ralyé lo moune épa zordi pa domin nou va gingn rézon par rapor lo bann moune léta néokolonyal i konpran pa — final de konte — oussa i lé noute lintéré anou.

A bon antandèr, salu !

Justin

PadportEnergies renouvelables

Signaler un contenu

Inn modékri, inn ti lavi, inn komantèr ?