Toulmoun i koné la-ba Boi-Rouz épi Le-Gol nana lizine i fé léléstrisité. Pou fé sa, zot i ansèrv sharbon épi la bagas kane. Toultan k’nana la bagas, i bril ; kan na pi, i bril sharbon tèr.
I paré sa sé in progré, pars dann in pé péi, i bril aryink sharbon, toultan, é sa i polyé l’èr...
Promyé débi, bann plantèr té i gingn pa aryin déssi la bagas ; épi, firamézir, zot la gingn in pti moné, mé pa an sifizans sélon zot.

Pars la pa bézoin ashté sharbon pandan in bon koup de tan, lo tan la koup donk i dépans moins larzan, épi i protèz la natir vik i larg moins gaz karbonik dann l’èr. Donkalor bann plantèr i domann rogoumant in pé z’ot prime bagas. Désèrtin la pas dann télé pou di sa. Byinsir zot na rézon !

Mé pou apiy zot koz — konm diré l’ot "gronouy la bézoin lo roi" —, zot la parti rod Virapoullé... Solman, boug-la lété sokrétèr la Fédékanne kan, lané 1969, la sign in lakor an kit-ta-bouèt.
Zistoman, dépi so lakor-la, bann plantèr té i gingn pi aryin dési bann sou-produi la kane, la bagas an parmi ! Zordi, li fé konm si li lété lo gran défansèr plantèr.
Alé oir li-mèm la plant kouto dann do, sé pa konbyin mil plantèr... Oté Vira, ti kalkil plantèr la fine obli atoué ?

Justin