Dizon ni pé di lé troi lé parèye, sof ké mi sorte rogarde dsu mon téléfone é li la di amwin : sé lo droi pou bande pèp an avoir in lalimantassion korèkt produi avèk bande métode dirab bande péizan la shoizi pou zot prodikssyon. I paré lo mouvman lé pou sa i apèl via campézina é néna in kantité milyon bande péizan lé rogroupé d’dan.

Mi koné pa si bande zinvité La Rényon promyèr lé rogroupé avèk banna sansa zot i préfèr évite déssèrtin mo d’vokabilèr konm lotonomi par ébzanpe. Pétète zot la mète dakor dsu lo mo san fé parti lo rogroupman bande prodiktèr dann lo monde antyé... Toutefasson kass pa la tète pou lo flakon provi ké ou néna livrèss... Kass pa la tète pou lo kontenan si lo konténu sé sak wi vé.

Sèl zafèr mi vé dire,sé ké opliss i sava, opliss bande rényoné, konm in pé toute demoune dsu la tèr i konsidèr la nouritir konm kékshoz inportan, é zot i vé karte lé dann zot min pou zot manjé... Mé koméla, nou lé loin d’lotosifizanss, lotonomi, sansa la souvérènté alimantèr é koman nou l’ariv-la ? Sinploman ké la koloni téi doi produi sak la métropol i di ali fé : in tan lété bande vivre, in tan lété lo kafé, in tan lété kann épi d’ote kiltir monétèr donk pou gingn larzan.

L’avé ossi la vaniye, jèrniom,vétivèr épi ankor plizyèr zafèr... Konm zot i konpran zamé nou la gingn shoizi par nou mèm sak nou téi vé kiltivé é sé pou sa ké ni ariv landroi nou l’arivé.Mé koman-koman nou va fini par shoizi nou mèm sak ni vé noute tèr i produi.

A bon ékoutèr, salu !