Médam zé Méssyé, la sossyété, koz èk mwin sé koz avèk in kouyon mé sé o pyé d’lo mir k’i oi lo masson.

Mézami mwin lé sirésèrtin dopi zot i koné la mori, zot i koné pa son tète.Mi panss pa okin kréol la fine oir son tète.Mèm la zamé rode son tète pars si la rodé la pa trouvé vik dann noute péi si li lé bien prézan mé son tète lé pa la. Romarke bien la pa arienk li lé konmsa :néna poisson vietnam lé konmsa, néna sardine an boite, néna ankor d’ote konmsa.

Mé kossa sa i vé dir oziss ?Mi panss sa i vé dir i fo pa rode linpossib.I fo pa rode sak wi trouv ar pa é la tète la mori lé introuvab. Konm midi a katorzèr. Konm lo pou dan la tète la poin shové. Alor si ou lé pa pou trouvé pokoué wi sava rodé. Par gou d’fatig la tète lézot ? Lékol mwin l’avé in kamarade téi rode démontr lo postulatum d’euclyde… Zistoman kékshoz i gingn pa démontré par définission.

Alé ! Mi kite azot rofléshir la dsi é ni rotrouv pli d*van, sipétadyé.