Samdi soir, bann télé la bate tanbour pou lo GIPN... la fasson zot i antrènn, koman zot lé armé, kagoulé... byin konm k’i fo pou défann bann sitoiyin kont bann téroris, sansa kont in forséné la pran demoun konm otaz. Tousa lé byin nésésèr... é na mèm inn-dé rogardèr la di konmsa, zot i san zot lé an sékirité. Byin bon ! Byin korèk ! Solman, rozman konm la di dann télé, dépi so fors éspésyal lé La Rényon, la pa ansèrv dé li,pars téroris na poin tro, é forséné, lé rar konm korn lapin.
La pankor ansèrv dé zot ?ziska zordi ? Télé-la lé byin sir d’son n’afèr ?
Bin alor, kissa l’otèr,dan la komine Sin-Lui, lo tronpaz de kaz, lo brakaz fizi pou fé la guèr déssi in jène madam apré dormi, lo défonsaz la porte avèk bann gran-gran kartoush... lo miz"hor-d’konba" d’in pti l’apartman byin modèst... Kisa ? Lé vré zot té apré rode inn-dé moun danzéré, si tèlman danzéré k’tribinal la larg azot pou l’instan.
Drol péi, ousa déssèrtin moun i batiz azot zournalis, i sava pa rode pli loin, pou konète pou kossa bann GIPN la fé sak zot la fé... Mi antan in pé i di, si sa l’avé éspass dan La Frans, bann ministr, bann l’assosyasyon, bann bèf-karote ziska, épi zournalis nora mélé, nora rode lopou avèk lo lante, nora rode lo pou kossa, lo par kissa, lo komansa... étsétéra, étsétéra, la ké lo ra.
La-ba, mé pa issi ! Issi, i bate tanbour pou zot ! Issi i fé la piblisité pou zot ! I amontr azot, konmsi zot lété lé éro di tan modern. I ansèrv de zot pou fé kékshoz lé pa si tèlmant rokomandab !

Justin