Méssyé Préfé, mi rapèl byin sak ou té i di, moi d’novanm, kan Mongin la di li sava anbar la Réjion. Ou té i di konmsa : lé pa dann out karaktèr pou dispèrs in manifèstasyon par la fors, ou lé si tèlman kont la vyolans !
Mi rapèl ossi kan la rout lété baré koté zilo, moin la pa vi aou alé di bann kamyonèr i fo zot i lès shomin lib, sansa tansyon pangar ! Si tèlman k’in pé la di nana in zirispridans i port out non é i pèrmète boush shomin La Rényon.

Fransh vérité, moin la trouv sak ou lavé di té korèk… sirtou pou mon bann kamarad sindika, ou byin lasosyasyon, ou pou bann jènn kan zot l’apré di zot i vé pa la loi déssi l’inivèrsité. Moin la pans : ala o moin in préfé va pa fé karsèr azot, matrak, maspap azot épi va lès azot fé z’ot protèstasyon trankil.

Mé kosa mi antann éstèr ? Mi antann ou noré konm di bann zasosyasyon k’i anbar pa la rout pou la kèstyon n’la vi shèr.
Pétèt moin la mal antandi, mé si moin la byin antandi, mi trouv nana inn afèr k’i klosh pa la-dan. Mi domann amoin si sa i dépann lo bann pèrsone k’i manifèst, ou byin out z’imèr aou. Suivan k’ou i lèv pyé gosh, ou byin pyé droit, ou i shanj manyèr alor ?

Justin