Mi koné pa mé dann fon mi pans sé oui pars bann léktèr témoignages sé in bann moun kiltiré. Mi pans zot i koné kozman lo fonnkézèr Prévert té i di : « Afors ponn la poul i fini par gingn zanpoul ». Sa in n’afèr sa, mé Prévert l’avé plin kozman konmsa dann son tète. Mé si ni vé arvir dsi sak nou la di an-o la ni manz la vyann, ni manj poisson, shovrète, karab é konpagni san inkyète anou si bann zanimo la la soufèr in bonpé sansa non. Lé vré, l’androi ni lé dann la shène alimantèr ni pans nou lé an droi fé sa. Ni kalkil mèm pa si boudikont manz la vyann sé gaspiye bann séréal konm gaspiy tout sort kalité vézétal. Mé pétète in zour nou va mord nout doi pars domin pétète nou l’apré fatig nout vyé momon la tèr avèk nout bann gaspiyaz. Alé ! Mi kite azot rofléshi la dsi é ni artrouv pli d’van. Sipétadyé.