Mésyé, Médam, La konpagni, koz èk moin sé koz èk in kouyon, mé sé o pyé d’lo mir k’i oi lo mason. Zot i koné tout demoun i oi tout défo, mé prinsipalman défo lé zot. Si zot lé anparmi l’moun dann inn parti i sifi zot i ékout bien pou antann in shaplé ladi-lafé dsi l’moun ou i koné mèm pa néna dé foi é la plipar d’tan ou lé apré domandé pou kosa i di zafèr konmsa, pou kosa i fé roprosh pou dé shoz solon ou i vo pa la pène. Inn foi moin la antann in moun apré rakont zistoir dsi lé zot é in ta d’moun té apré ékout sa konm parol l’évanzil, mé an moin mèm, moin té apré pansé lo kozèr défo konm li done l’ot, li néna douz a la dizène. In zour li t’apré di in n’afèr grav, dsi in moun té pa la, l’èr-la moin la di ali, si ou lé sir sak ou i di, akoz ou i fé pa vnir la pèrsone pou dir aèl sa an fas. La konvèrsasyon l’arète la, mé moin la konm konprann moin l’avé fé in sakrilèz-moin la konprann moin l’avé kass avèk in labitide demoun mé o fon mi rogrète pa. Pou kosa ? Pars antansyon pangar lé ga, sak zot i di, épi sak zot i répète néna défoi plis la dinamite la-dan é la dinamite sa i pète. Konm zot i koné. Alé ! Mi kite azot rofléshi la dsi é ni artrouv pli d’van. Sipétadyé .