Matant Zélida la ékrir Justin :
Mon shèr nové, mon spès salté, rouj de fon dovan létèrnité,
A bon ! Si mi konpran bien, astèr zot modèl sé lil Moris. Si i kroi azot, tout sak i fé laba lé bon é tout sak i fé isi lé pa bon. I fo kant mèm bien romarké, isi la fé la rout Tamarin, i sort fini lo pon dsi la rivyèr Sin-Etiène, l’apré marsh pa ranforsé pou fé la Rout litoral sis voi. Biensir, mi anparl arienk bann gran shantyé é pa bann ti, pars zot i vé, zot i vé pa, kan in moun i débark Zilo, li oi bien La Rényon sé in il an shantyé. Sa na son inkonvényan, sa na son avantaz, mé sak i pé dir, sé ké ni rès pa bra pandan, é ni fé dé shoz. Donk, asé vant lil Moris épi asé abès anou, pars sa va fé in mové répitasyon pou nou é sa la pa bon pou la konfyans. La konfyans, ou i koné, sé lo méyèr motèr pou in lékonomi. San konfyans, dizon na poin arien k’i fé. Tok ! Pran sa pou toi !
 
Justin la fé pou répons :
Mon vyé matant k’i koz touzour la boush rouvèr,
Lé pa késtyon mète Moris anlèr épi bat La Rényon atèr, mé solman i fo oir la réalité konm èl i lé koméla. Moris lé an shantyé dakor, La Rényon osi lé konm an shantyé, dakor osi. Mé si i rogard bien, bann shantyé i prépar l’avnir konm k’i fo, Moris astèr lé an avans dési nou, é kan li té an rotar, ébin, li l’apré ratrap son rotar. Plizyèr légzanp : Plézans, l’aéropor Moris, lé apré agrandi épi modèrnizé vèy pa koman. Moris laba, banna l’apré fé lo métro lézé é lo prozé la fine bien dékolé. Arzout èk sa, lo téléférik Sèt Kaskad, pou bann touris épi pou bann travayèr, sa la pa in bon n’afèr sa ? Mi koné osi banna l’apré fé avans lo projé lénèrzi a partir lo d’mèr... Mi sava pa dir aou, ankor in foi, tout bann bon projé nou la mèt dsi lo ray é la droite la fé dérayé... Astèr, bann gouvèrnman Moris, i sifi zot i sava rode dan nout sak zidé é zot lé sir trouv sak lé bon pou zot. Alé oir, nou, ni lès tousala tonbé. M’ashèv dir aou, tout zidé, épi d’ot ankor, ou i trouv sa dan bann plan Parti kominis. Lé konm sa é pa otroman. Tok ! Pran sa pou ou !

 Justin