Oté

Ou la gingn kant mèm in n’afèr d’bien la dan !

Justin / 24 désanm 2018

JPEG - 43.6 ko

L’ané 2018 i sava kass la pip : in pti somenn ankor é nou va atak l’ané 2019. Alor ? 2018 in bon, in mové k’ané ? Si ou i ékout demoun dann radyo i fo mète in poin final avèk 2018 pou atak l’ané 2019 k’i dovré z’ète in méyèr l’ané. Mé boudikont, avan atak l’ané 2019 ni koné pa réèlman.

Sak moin lé sir sé ké pou désèrtin sar in bone ané, é pou d’ot sar in mové l’ané. Sak i sava gingn in gran maladi l’ané 2019 li sava pa dir amoin l’ané 2019 sar in gayar l’ané. Parèye pou sak i sava pèrd z’ot travaye é pou sak i sava an avoir in gran désé dann z’ot famiy.

Sa i fé pans amoin l’astrolozi. Zot i koné so psédo-syans i anons par avans sak i sava ariv aou dan l’ané sirtou si i fé sa suivan bann sign astral. Pé pa dir amoin tout demoun lé né sou sign poisson i sa pass in bone ané : pou désèrtin oui, pou d’ot non. A ! L’astrolozi ! Ou i fé vann papyé ou la, ou i fé ékout demoun la radyo, abone demoun google étsétéra, étsétéra la ké lo ra.

In sèrtin Voltaire téi di konmsa - éskiz amoin moin la fine anparl de sa ! - lo l’astrolozi lé né lo zour lo promyé éskrok la trouv dsi son shomin lo promyé roi d’kouyon. Mé, mi pé dir azot mi akout sansa mi lir lo bann prévizyon l’astrolozi. Pou kosa ? Pars mi profèr i anons amoin bone nouvèl plito ké movèz nouvèl. Sa i mète amoin in pti bonèr dann mon kèr ziska lo soir.

Na poin lontan moin la trouv in madam paré an trantsis, bèk roz, vèrni dsi lo zong, abiyé an poupète bok. L’èrla mi domann ali si li la gingn in rankar sans a li la trouv in plas travaye, sansa ankor si son famiy la invite ali pou in grayou. Li réponn amoin, dann zournal èl la lir èl i sava trouv in soutienn kèr… Apré èl i di, lé posib lé pa vré épi li fé pa okin bon rankont.

Mi di aèl, èl va gingn kant mèm in n’afèr. El i di amoin : kosa ? Mi arvir aèl : « O moins ou la lèv bonèr, é ou la fé aou bèl, sa in gran kado ou la fé aou ». El la réponn amoin : kozman konmsa ou na ka gard pou ou ! Sé pa si èl noré pa azout : « Ou i gingn pa fèrm in pé out také ? »