A ! Mi oi aou bien déyèr out mashine. Ou lé bien poli kan ou i di bonjour, kan ou i di rovoir. I diré près ou i fé in sourir, sansa par abitid, ou i amontr solman in pé lo bout out domino blan. Zordi lo shèf la shoizi aou... zordi out tour. Mé moin na konm linprèssion out tour i arvien souvan... La pa la promièr foi mi oi aou apré travay in dimansh, sansa in zour férié.
Mi domann amoin akoz sé ankor out tour zordi : ou la pa tro jènn, ou la pa tro vié non pli : I diré soman ou lé rant lé dé, dann milié out laz travay.
Konm diré l’ot, zis laz ou nana le zinkonvénian san an avoir lé zavantaz. Pars mi san bien ou lé la, mé out léspri lé pa la. Out kèr lé konmsi ou la lèss in bout la-ba out kaz. Ou i pans sak lé pli fèb parmi out zanfan ? In papa la pa in momon, mèm si li pé an avoir bone volonté. Épi sak lé pli gran ? Oussa ankor zot la parti vangué ? Lantrènman kamarad lé riskab amènn azot dann malizé ! Oui, mé ou lé la, ou lé pa la-ba !
Shèf-la, li lé pa la zordi ! So léspèss ra ! Pou kossa toultan sé ou k’li pran pou travay dimansh ? Kossa li vé ? Pétète fors aou alé konzé maladi, pétète fé démissione aou ! I prétan li na in kopine i rod travay. Demoun i di, mé ou, ou la pa vi ! Sak ou i oi, sé k’out tour i vien souvan. Bèl mèr va pans sa in manièr pou fé fèr travay ménaz par out mari. Sète-la i di pa arien, mé fors a fors, i koné pa si sa i rant pa pti-pé pti-pé dann son tète. I koné pa si in zour sa i pète pa san k’ou i atann, in zour ou sar vané vèy pa koman, i zour la fatig va pèz aou atèr, in zour la moral va flanshé. Mon dié, fé k’zour-la i vien pa... mi priyèr aou ;
Pli pir, (zordi) la pa dimansh, (zordi) sé samdi... mé samdi vin désanm. Partou i fète labolission, mé kèl kalité labolission pou ou ? Nana touzour bann shènn invizib déssi out zaré ? I prétan zésklav té i travay pa dimansh avèk zour férié. I prétan ! Ou i koné pa ou. Ou i koné arienk sak ou i lé, sak ou i fé... Ou lé pa zésklav biensir, mé lé près konm si !

Justin