Mésyé, Médam, La sosyété koz èk moin sé koz èk in kouyon mé sé o pyé d’lo mir k’i oi lo mason. Provèrb-la sa in provèrb l’Afrik mé si ou i kalkil bien li pé z’ète in kozman tout péi in kozman tout demoun néna dsi la tèr.A komansé i fo ni sèye oir lo dégré d’vérité : sa lé vré san pour san, sansa arienk in pé, sansa ankor pa ditou ? Mé zami sa i doi fé travaye nout koko in kozman konmsa. Pou kosa ? Pars demoun i pé kalkil zot paran lé vyé zé, épi zot lé pa vréman dann z’ot tan. Si ou i rézone konmsa, sa i vé dir ou i pans néna in gran fraktir rant bann zénérasyon-ou i pé mèm pansé néna in pa d’zéan rant out zénérasyon é sète out bann paran. Zot i pans pa néna in zafèr i klosh pa ladan ? Demoun i shanj lé vré, zénérasyon an zénérasion lé vré galman mé moins site ké ni kroi. Sirtou pou bann valèr, la b az mèm sak i fé nout l’ilmmanité : ni pran, ni arzète, ni arvien dsi, é final de kont ni rotrouv anou pa tro loinn nout poinn dépar. Alé ! konm mi di azot sé in lokazyon kass son tète si ni vé rofléshi la dsi. Alors, alon rofléshi la dsi é ni artrouv pli d’van. Sipétadyé !