(in roprize moi d’mars 2020).

Méssyé, Médame, La Sossyété koze èk mwin sé koze èk in kouyon mé sé o pyé d’lo mir k’i oi lo masson.

Provèrb-la, sa in provèrb l’Afrik mé si wi kalkil bien li pé z’ète in kozman tout péi in kozman toute demoune néna dsi la tèr. Plizanpli vré a mézir lo tan i pass.

Pou komanssé i fo ni sèye oir lo dégré d’vérité néna ladan : sa lé vré san pour san, sansa arienk in pé, sansa ankor pa ditou ? Mé zami sa i doi fé travaye nout koko in kozman konmsa. Pou kossa ? Pars demoune i pé kalkil zot paran lé vyé zé, épi zot lé pa vréman dann z’ot tan. Si wi rézone konmsa, sa i vé dir wi panss néna in gran fraktir rant bann zénérasyon.

Wi pé mèm panss néna in pa d’zéan rant out zénérasyon é sète out bann paran.

Zot i panss pa néna in zafèr i klosh pa ladan ? Demoune i shanj, lé vré, zénérassyon an zénérassion lé vré galman mé mwins vite ké ni kroi. Sirtou pou bann valèr, la baz mèm sak i fé nout l’imanité. Ni pran, ni arzète, ni arvien dsi, é final de kont ni rotrouv anou pa tro loin par raporte nout poin d’ dépar.

Alors, alon rofléshi la dsi é ni artrouv pli d’van. Sipétadyé.

Justin