Mwin lé sir ossi an parmi zot néna bonpé i sava oir zot médssin pou tash moiyin guérir inn-dé mizèr i kontraye zot kor épi son bon fonksyoneman. Aprésa zot i sava la farmassi pou pran médikaman. Mé sak néna la shanss avoir son momon, osinonsa son gran-mèr i koné koman i fé bann tizane sinp i pran sa ossi pou guéri pli vité.

Mwin lé sir an parmi zot néna sak i pran médikaman doktèr épi tizane sinp an mèm tan. Mwin lé prèské sir zot i poz azot késtyon : in pé i doi di, dann zot kèr, toussa zafèr mi boir la, sa i antan inn avèk l’ote sa ? É si i antan pa kèl sé lo rézilta ? Mé konm zot la poin la réponss zot i fé doktèr par zot mèm. In ! Kossa mi antan ? Tizane sinp i pé pa fé d’tor pars lé natirèl ! Mézami konm zot i koné toute lé dann la natir ! Médikaman doktèr mèm défoi i sorte dan la natir !

Mézami mi panss pa néna in diksyonèr la konpatibilité alor lé pa éskli ké pou fèr azot lo bien zot l’apré fé lo mal-amoinss ké zot tizanèr lé kalifyé, konm kaziman in doktèr é pétète li koné son n’afèr — konm k’i diré li toush son biye dann sa.

Sa i fé panss amoin in zour in travayèr la gingn lipèrtanssion. Médsin travaye l’arète ali é la di ali alé voir son doktèr-li la parti mé kan li la sorte doktèr avèk in sharjman médikaman, son bèl mèr la di ali, foute toussa d’koté, m’a done aou in tizane losto a suiv uite zour d’ran é ou va oir si sa i dress pa ou dsi oute pyé. Fransh vérité li la rétabli. Mé kan li la parti doktèr pou la ropriz travaye li la di lo doktèr li la pran lo médikaman konm k’i fo mé lo doktèr la di ali : « vi kroi mi sorte déyèr solèye vou-la ! Sirman ou la prann in tizane sinp ! Ou la poin in profil pou pran médikaman doktèr ! Mwin ossi mi fé mon possib pou pran tizane sinp kan mwin lé sir sa i fé d’bien ! »

A bon antandèr salu !

Justin