Ral son karang, sa in kozman la bien évolyé dann lo tan. In tan téi di sa kan i sava pèsh a la trène : kanote téi fish an avan, la lign dann son siyaz ziska trap in poisson téi naz dann domi profondèr : kisoi karang, kisoi lo thon, kisoi ankor bann poisson i apèl pélajik… Kan lo zin i trap pa arien, pars sa i pé arivé, lo péshèr i gingn in kou d’somèy é sé lo somèye k’i vien lo karang par li mèm. La vni sirtou : « Ral son karang » é sa i vé dir ral out somèye kisoi dan la mèr, kisoi dsi la tèr, kisoi kan bèf la koup kann téi ral lo sharète a montan. Parl pi kan afors lo to d’sik lé for dann san ou i gingn somèye ; i di galman ou i gingn tatane é la pa bézoi manz brède morel pou gingn tatane la. Alé ! Mi lèss azot rofléshi la dsi é ni artrouv pli d’van sipétadyé.