Oté

« Ou va dor atèr ! »

In kozman pou la rout

Justin / 11 octob 2019

JPEG - 43.6 ko

Mésyé, médam, la sosyété, koz èk moin sé koz èk in kouyon-sé o pyé d’lo mir k’i oi lo mason. Mi pans zot i koné kozman moin la mark an-o la. Lé vré kozman-la lé déza in pé vyé, vik étan jenn moin téi antann ali déza. Dor atèr olèrk dor dsi in li ? Sa la pa la prèv ou l’amenn la pyès konm i fo Kan ou lé jenn, ou lé naïf é ou i pans tout zafèr va tourn an out favèr mé si défoi lé vré, défoi lé pa vré é kan ou la fé in l’érèr ou i pèye kash. Sé konmsa étan jenn-jan désèrtin la anbète in fiy mé kan la ménas azot kanon fizi, sèl solisyon lété d’maryé é maryé kont out volonté la pa in n’afèr a fèr. L’èrla ni parl maryé, mé dann la vi néna in kantité loakzyon pou ou angaj aou é la pa toultan out lantropriz i ranport lo siksé ou i atann. Donk, si ou i vé fé kékshoz, kalkil aou bien . Fé tourn out prozé dis foi dann out tète pars ou i vé ou i vé pa out prozé la pankor paré kan ou i kroi li lé paré. Alé ! Mi kite azot rofléshi la dsi é ni artrouv pli d’van. Sipétadyé !