In lamontrèr, sé in moun kiswa in bononm ou kiswa in madam pou in madam i di in lamontrèz, zot travay sé amont marmay lir, ékrir, konté, boudikont fé lékol pou zot, prépar marmay pou in domin klèrsi, kab drèss dovan pou gingn anparé si néna kou dir, kab marsh dobout sontousèl osi. In pé konm kan i prépar kok pou fé batay i mèt zèrgo èk bann marmay. Konprann a zot, in limaz byinsir, vik ni viv in pé konm dan la zingl, fo èt féré zordi pou shapé. Minm si bann lamontrèr, lé prinsipal an promié, anon pa kont solman si zot pou fé tout sontousèl, nout tout i dwa mèt la min ansanm, fé in lantouraz famy, travay an touk konm i di. Lèss bann lamontrèr fé, mèt pa baton dan zot rou.

Mé néna dot moun i fé osi lo lamontrèr, in pé touzour a zot i koné tout, sad zot touzour pli méyèr, touzour plis mié. Si nout kozé néna i yinm pa, i di a nou odrémié pa koz konmsa vik zot i vyinboupa konm nou, pou zot odrémié may la lang konm zot, zot i profèr. Pou manzé, la lé pli pir ankor. Lot zour mi sar réstoran sin pièr, mi komand in kari pwason, lo sérvèr i aminn dann in plato, do ri èk lo grin, lo pwason é par koté in pé piman. Bin, mi di a li la pa mèt piman dann pwason la don ? I di a mwin non, i mèt pa pou rapor la kliantèl déor. Kèl kliantèl déor mi fé pou répons ? Bann touris i yinm pa. Mi fé konm banna i yinm, konm zot la amont a mwin. Mi di pou rézon, a toué kan ti vwayaz, ti sar kiswa an frans, an ind ousinonsa ayèr, éské i fé kui manzé konm ti inm ousinonsa ti manz sak néna.

La mwin la kal a li. Bann éspésialis i vé ni fé touzour konm déor. Par ékzanp koman plant in pié pistash, néna la finn di a mwin la pa konmsa i plant, mèt do lo o pié i di lé mié, aroz pa partou. Poitan laba na pwin pistash mé zot i koné. Koman i mont la kaz pou pa tonbé la osi in pé i koné mié, mé déki fé in boufad lo van la ba lo twa i vol an zékli. Néna in takon zafèr konmsa banna i aminn isi é lé pa touzour bon pou nou. Osi anon arèt gobé. Pou manzé ankor, inn la di a mwin, fo fé pwason an bouyabèss. Mon fougad la monté, é mon bouyon mourong alorss ? Koméla kan i moun i vwin mon kaz, mwin néna osi in pé lonékté pou li, mi roswa a li byin, mi di touzouz, fé konm shé ou mé oubli pa ou lé shé mwin.