Ni pé anparl pliss inn-sé zour, mé zordi mi kontante dir azot dsu la késtyonn manzé,Dev la propoz bann morisien k’i pé i plante in pyé frui-a-pin dovan zot porte. Akoz in pyé frui-a-pin pars Moris konm nou néna in gran problèm, sé sète lotonomi alimantèr… Mézami, noute zoinal i anparl sa souvan konm in pwin tré inportan si noute pèp konm lo pèp Moris ni vé o moinss dor vante plin.

Mwin la lir dsi FB in ga té apré anparl sa, pars avèk la guèr, nou té pa sir bann bato nora kontinyé navig an pé,é anpliss ké sa nou noré trouv in problèm sèryé si bann l’iran téi désside boush lo kanal Ormuz-donk in n’ote problèm lotonomi nora pozé sé lotonomi énèrzétik » san konté biensir la késtyonn noute vré dévlopman.

Zot va dir amwin la guèr la fuzé é l’arété boudikonte pli vite ni kroiyé. Donk ni lèss noute pèr pou in proshin tour. In proshin tour ? Oui vik Israel épi zétazini l’ariv détrui lo bann zinstalassion nikléèr l’Iran.Mé bann zoinal amérikin i komanss dir la pa sir .Pétète L’Iran la déménaz son éstok liraniome anrishi. Trump i kroi pa, pou l’instan.

Mé lo zour li va konprann son ane sé inn bourik, kossa li va fèr ? zot i panss pa li va rokomanss fé bonbardé é nou, konm Moris, konm péi komor épi d’ote ankor nou lé riskab d’ète annuiyé pou vréman… Alor lotonomi alimantèr épi lotonomi énèrzétik i aparète konm kékshoz pli nésséssèr, pli irzan é konm priorité pou nout toute. Alor, alon bataye pou sa ! alon fèr sak ni gingn ! Mi panss Paul Vergès nora pa koz otroman k’sa.

A bon antandèr salu !l vantredi