Matante zélida la ékrir Justin :
Mon shèr nové, mon spès salté,
I pas pa d’zour san k’i anparl lo viol par issi, lo viol par la-ba, issi mèm konm dann péi déor, é bin m’a dir aou in n’afèr, bien sir ou sar pa dakor avèk moin, mé i fé arien... Donkalor, m’a dir aou : Na d’ fiy i shèrs sak i ariv azot ! Oui ! Moin la parti la plaz avèk mon klèb troizièm az, moin la vi d’zafèr. Fransh vérité, napoin arien pou ésèy voir vik tout lé o van... Vi oi pa si ou i amontr sa konmsa, i pé va sote déssi pou kapé ? Alors, di pa moin k’na in pé i shèrs pa ?

Justin la fé aèl pou répons :
A bon ! Sé bann fam k’i rode ? Madam té dan la prizon la-ba Marseille, té i rod ossi kan i prétan in polis la korbis aèl kont son volonté... Matante ou i koné, moin nana d’fiy ossi, mi éspèr pa i ariv azot in kékshoz konm sa... Promié z’afèr é sèl z’afèr, dann in rolasion i fo réspèk la volonté dmoun. Lanvi i zistifié a tout ! I fo la volonté, l’anvi inn-a-l’ot i artrouv, i tonm dakor inn sanm l’ot. Ala in n’afèr tout paran, tou bann lédikatèr i dovré aprann bann garson, sé lo réspé pou bann fiy. Oui, lo réspé, matante !

 Justin