So matin, moin té dsi la rout. Pa konm la sint zourné, mé près tazantan. Kan toudinkou téklé fone la soné. Té lo méyèr dalon moin néna dsi la tèr té i sort sonn amoin. Moin la kal mon vyé kok loto dsi lo bor trotoir pou ékout kosa li l’avé pou dir amoin.

Li la parl amoin in modékri dann zoinal dé l’il épi la di amoin, dann zoinal-la, in zournalis i done Kiba konm modèl. L’été asé rar pou signal in n’afèr konmsa. Donk moin la kontinyé mon shomin épi moin l’ashète lo zournal dé k’moin la gagn ashté é sak moin la lir moin la trouv vréman intérésan. La pèrsone té i fé in sort konparézon rant La Rényon épi Kiba.

El téi ékri apopré sak i suiv : La Rényon malgré tout l’amour kli la gingn avèk la natir i kontinyé tann son min pou domann siouplé pou tout sak èl la bézoin… I apèl sa l’asistans. Alé oir, loin la-ba dann la mèr bann z’antiy in péi, in zil galman, i apèl kiba kan li la pass in tan difisil – par la fote lo boykotaz bann z’amérikin !-li la kont dsi son prop fors, dsi sak la natir la donn ali, dsi lo l’énèrzi son bann z’abitan é koman-koman li la nyabou travèrs in si tèlman mové pèryod-dann bann z’ané 1990 par la.

L’èr-la ou i san bien sak èl i vé dir. El i vé dir, si kiba la nyabou fé sa, akoz pa La Rényon ? In bon késtyon asiréman. Mé, avan ké mi dékol dsi mon syèz l’oto, la rézon i pèz amoin atèr é mi domann dann mon kèr, kosa k’la mank anou ? É mi mète pa lontan pou trouvé : in bonpé z’afèr sa lé sir, mé lo pli inportan sak kiba l’avé ranport lé z’arm dan la min. I mank anou la souvrènté dsi nout déstin. I mank anou la souvrènté nasyonal. San sa na poin moyin pou ansort anou konm k’i fo.

NB In romark moin la fé kan moin la lir lo modékri « L’embargo populaire »par Joana Atchama dann le Jir lo 11 novanm. In modékri i fo lir a tou lé kou.