(page 16)

Gran matin, mi lèv. Mi antann, lanploi lé an bone favèr. Dé poursan o-moin, si la pa plùs. Soman, i fo kroir tout se bann bone nouvèl i konsèrn pa nou. La Rényon "shomaj i rèss shomaj". I fo rann o shomaj sak i apartien o shomaj. Demoun ti va rèss ti. "Sak nana na po gaté, sak na poin na poin di-tou", la di Tantine Zaza. Dizon na rèss parkoté lonbraj poursantaj Paris.

Sak i fodré, sé okùp vréman, pouvréman, tout shomèr-là. É arèt batt sù zot do. Arèt dir sé la fèt pou bann shomèr, i profit larzan zinpo. "Vien prann not plass, si lé fantazi", noré di lontan. Zordi, parèy : i préfèr batt sù le do bann shomèr, o-lèrk ronf sù le do bann shajèr dlo.
Okilé bann kontra RMA ? Rakonté, mé abandoné. Bann kontra d’avnir ? San zavnir ! La pokor anonsé son bann gran shif. Kontra d’akonpayman ? Va akonpagn sù bor kanal. Kinm la fine di, inn tiork va rèss dann kanal. Fo kroir tout bann promès la kal nout kanal.

Zordi, lé bonfavèr pou bann patron. Po zot, na toujour plùs. Plùsh plùto bann kaniki po fé viv bann gro zozo. Ankor k-la pa asé, soukouy son palto, pou ramass son dèrnié ti léro. Krin’n manké lù gèl tro, la fagot inn ot ti kontra, plù gabié astèr. Travay aou dé zan po mont out gadianm travay. É an-plùs, fodré dir : "Oui, misié. Biensir Boina".
Zangoun, vèy pangar in jour i ar’kri zistoir kod nwar. Soman-là èk ti travayèr.

Zistin