Mé zami, dalone, dalon épi mon bann shèr kamarad vi ké nou lé dann « problématik-la ». Tousa pou dir azot moin la lir in lédito Témoignaz plito dé-troi foi k’inn é-mi vé pa done konsèye pèrsone-mé mi di sa sé in lédito ké nout tout i doi lir, partazé, rofléshir, apliké si i nout griyaz rofléksyon. Nou lé marksis non ? Nou lé léninis non ? Nou lé polvèrjésien non ? Ébin sa i doi pèrmète anou oir klèr dann la kriz nout parti i koné dopi kéktan.

La fote kisa ? In pé nout tout, é konm la litératir i di : « shakinn néna son par é tout néna tou antyé » Ké nou lé mor, ké nou lé vivan, ké ni milite ankor, sansa ké nou néna dopi kéktan l’arm o pyé. Donk, sanm pou moin, lo léditoryalis nout zoinal néna in gran mérite vi ké li apèl in shat, in shat, é ké li parl la kriz nout parti é ni koné sa la pa in gro mo. Astèr i fo oir si lo mal i pèz dsi nou, néna son médikaman-sansa son tizane granmèr - sansa si li na poin.

Antouléka, sak moin lé sir, si nout tout, sak la gingn la shans grandi dann zip-konm dann zip in momon - lo parti épi konète son zidé, konète osi bann problèm nout péi épi nout sosyété. Mi pans nou néna zordi ankor dann nout mémoir bann diskour bann dirizan istorik : néna Paul bien sir épi néna lé zot i fo pa obliy banna. Tir dann fon nout mémoir diskour banna téi pronons dopi l’ané 1959 é a suiv é bann zidé banna téi dévlop é…romète sa a l’ord di zour-pa bann késtyon okazyonèl, mé bann késtyon ni pé apèl sa strukturèl.

In vyé kamarad la di amoin na poin lontan li pans lo poin nout parti la fé l’ané 1959, sa lé ankor vré é sé sak mi pé apèl strukturèl pa okazyonèl… Moin la lir dann in n’ot lédito la pass mardi sak in n’ot kamarad la di. Li la di isi La rényon la fine fé bien dé shoz, dsi lo plan la santé, dsi lo plan lédikasyon, la formasyon, dsi lo plan bann moiyinn transpor, dsi lo plan informatik é ni poz anou konm késtyon : Pou kosa nout péi i dévlop pa ? Néna tout sak i fo pou dévlopé, mé néna kékshoz i kol pa. In zanr péshé orijinèl la départmantalizasyon, la réjyonalizasyon é tout sak i s’ansui.

Alor pou kosa nout lékonomi i dékol pa vréman ? Répons : lo néo kolonyalism. Sirman, mé dann détaye, pou bien konprann, mi pans i fo ni ésplik sa - i fo sak néna zidé dann nout parti i ésplik anou sa tèl fason ni konpran bien épi ni rolans anou. Pars ni pé rolansé d’apré zot ? Ziska mon sèrnyé zour m’a di oui.