Mi pans zot konm moin, ni suiv tou lé zour-san dir !-lo bann ésytatistik dsi lo kovid 19. Mèm si ni di ni s’anfoutsa, ni s’anfoupatsa. Mèm si ni ékrir tazantan néna in sèl gran lépidémi La Rényon séla ding. Mèm si tazantan ni di fo fé in kont sèryé avèk la léptospiroz plis k’avèk lo kovid. Fransh vérité, maladi-la i trakass tout rényoné, I travaye nout tout, I tortuye nout boiyo par l’intèryèr. Fransh vérité !

Pou kosa ? Sinploman pars ni gard télé nout tout é dann télé tou lé zour shak zour néna dé koi pou kass out spmèye. Tazantan i amontr aou in malad danzérèzman malad branshé avèk in réspiratèr. Tazantan, i amontr ziska bann poklin apré fouye la tonm dsi la plaz Sao-Paulo pou mète lo mor par dizène, par santène, par milyé konm téi amontr néna kéktan bann zanjin apré fouy la tonm dann zéspas vèrlaba dann Nouyourk. Alor, ni vé ni vé pa, mé sète afèr kovid 19 sa lé marké an nou, é la pa dsito li va kite anou trankil.

A bien sir, in pé i brandi zot bézoin ékonomik : zot i domann i rouvèr Zllo a dé batan. I domann i fé gran-gran rasanbloman. Sétaki, dann in tan normalman ni dovré z’ète an sirvi, l’apré kalkil rofé lo mond konm li lété yèr mèm avan-yèr. Zot i rèv bann lavyon an sirsharj apré amènn bann touris sansa konsidéré konmsa. D’ot néna arienk an tète z’ot zétid pou alé kanada.d’ot ankor lé isi i rode kour an frans, ésansa lé an frans épi i rode kour isi.

Gouvèrnman, mandan éstan-la, konm li na poin la syans égzak li osi, li sède in pé térin par isi, li sède in pé par-la... Dakor mél o nonm mallad li goumant firamézir, talèr li koup la lign san. Talèr bannzarivan i kontamine z’ot famiy… Ni obliye, dann in ka kon msa ; ni vé ni vé pa, i fo fé zoué la sékirité toulmoun é paf é plézir inn, fé plézir l’ot, akord in favèr lé z’inn, akord in favèr lé z’ot.

Ziska kan ? Ousa ni sava ? Mi oi déza gro konm in mézon-mi koné pa pou kosa - lo vré pandémi souk anou isi. Pou moin, ni vé ni vé pa, maladi-la ni koné pa li pou vréman é ni pran in rik sanm pou moin initil. ZMé zami, mi di azot franshman, sète afèr-la sa i san l’aye.