Mézami vu laz mwin lé fine arivé, mwin néna pti zanfan-an touléka mi pé an avoir. Sipozon ké mwin néna in pti zanfan dann klass kour moiyin dé. Sipozon ké dann son klass dsi l’kou d’ moi d’mars l’avé inn-dé ka kontak é k’i fèrm son klass konm zot i koné i fé. Sipozon ankor son métrèss lékol i tonb malade dé somenn é ké la poin ranplassan. Sipozon ankor vantredi passé kan li ariv lékol, lo diréktriss an pèrsone i di i fo li rotourn son kaz pars na dë kontalk de kontak. Astèr dizon li la pank in zour d’vakanss.

L’èrla lédikassyon nasyonal i di li va travaye par réskopondanss-dsi lordinatèr si zot i vé kan la mashine sar paré pou démaré. Si la mashine i démare pa, fé konfyanss Roland Garros avèk son min dan la posh. Mé si néna in minist néna poin arienk lo shif in marmaye mé toute marmaye néna dann La franss. Si li di.. In sipozission : par l’fète i pé fé travaye an réskopondanss, i pé travaye dsi linternet. An pliss i pé an avoir in robo pou komande toussala. Donk lékol la pa si tèlman nésséssèr..

Oui ! Mi antan bien lékol néna in rol sosyal. Dann tan téi di lékol sé lékol la vi. Dakor, mé léspor, lo mèrkrédi zénèss, lo klèb zéshèk. Sa sé léko l la vi ossi é sa néna in rol sosyal. Donk i pé dispanss lékol par li mèm si bande robo i zoué bien zot rol : In sèl big zafèr laba dann Paris pou suiv toute marmaye lékol La Répiblik. Va fé d’zékonomi dsu bande zamontrèr : avèk trépé zinformatissien i pé ranplass bonpé zamontrèr sirtou si bande robo lé programé pou lo boulo.

Antansyon, lo bi sé pa fé zékonomi, pars in bon lékipman an robo épi an program sa i koute pli shèr ké lédikasyon nasyonal. In linkonvényan ? Non in lavantaz pars sa i raporte profi an poundyak bande gran patron lo 4karante. Alor, in gran lavantaz pou lékonomi ! A ! Zot i inkyète pou oir kissa i sava fé toute bande program-la ? Ébin sé bande robo zot mèm : antréné pou sa, ékipé pou sa, bien fourni an lintélizans artifisyèl... Lafère lé fète é fourni.

Oui mé i sava pa shoizi la tète ladan ? Lé possib, mé zordi i shoizi bien la tète. La prèv : konbien zanfan péizan, zouvriyé, shomèr i pran lo lassansèr sosyal avèk sa ? Tré pé. Donk lo robo i pé ète antréné pou shoizi la tète pou pa pèrde lo tan é pou fé vite donk paré lo pli préssé… Pinss amwin lé ga ! mi dor pa mwin-la. Dé shoz konmssa d’apré zot, i pé pass dann bande sèrvo malade ? Kossa sèrvo malade sa i anmank pa ! Si lé konm sa, oussa ni sava ? Oussa noute lékol i sava ?

NB Si sa i plé azot zot i pé zoué galman avèk toute séktèr lékonomi épi la sosyété, lo loizir, lo plézir é mi di azot, zot sar pa déssu !