Mésyé, Médam, la sosyété koz èk moin sé koz èk in kouyon-sé o pyé d’lo mir k’i oi lo mason. Mi pans zot i pé konète kozman-la, mèm si lété pli vré dann tan d’ lontan ké koméla : dann tan l’avé balo partou kisoi dsi la tète bann fanm i sava lav linz la rivyèr, kisoi azardyé kan li sava vann son marshandiz, kisoi ankor kan i mète in moun déor avèk son balo. In balo mal amaré sak lé d’dan lériskab shap atèr-mi pans zot i suiv amoin bien zot la. Mé néna lo balo d’la vi, kan ou lé dann difikilté d’larzan, la santé, sansa konm i di « moral ». A ! Mé zami, si konm moin zot la fine viv in bon koup de tan, défoi zot lé dann la gété, défoi dann traka, défoi out balo lé bien amaré, défoi non. Défoi ou i pans la kord é tan myé si ou i sava pa pli loin k’pansé. Dizon, la vi lé konmsa, avèk son bon koté épi avèk son mové koté mé i fo pran ali konm li vien. Sansa na poin solisyon alor ! Alé ! mi kite azot rofléshi la dsi é ni artrouv pli d’van. Sipétadyé !