Solon Daniel Honoré, sa sé in manyèr an misouk pou fé romark in moun son bragète lé ouvèr. Lo zonm La Rényon nana la touzour an avoir problèm avèk so késtyonn bragète-la. Souvan dé foi kan na bouton, i ariv k’in bouton i kass é aprésa ésèy pa fé romarké ou na in problèm so koté-la. An plis kan lo bouton èk lo boutonyèr lé dékalé : la ou i gingn la ont la ! Mi rapèl mèm k’in zour mon fèrmtir éklèr la manké é zis so zour-la profésèr matématik i anvoye amoin koriz in problèm tablo. Momandoné inn-dé fiy promyé ran la romarké : tchuitt-tchuitt dann zorèy inn-a l’ot. Momandoné profésèr la romarké é lès ali pète a rir. Pou mon par, moin la vni rouj konm tomate é moin té i koné pi koman ansort amoin dann in n’afèr konmsa. Lété koméla, moin noré anvoy fèr fout, mé kan ou lé jenn la pa parèy.